《讀者投稿》
你好，想分享我過左身既姨媽既極品奶奶事跡。
1）廿幾年前，我姨媽第一次拍拖就正正經經咁諗結婚，結婚前一年兩口子買左間細細既屋住埋一齊。因為以前果個年代唔算好興同居，結果結婚果時奶奶以佢「已經蝕底左比自己個仔」所以表明「唔需要買龍鳳手鐲」比佢，禮金更加「意思意思就好」。我記得果時仲細睇住佢係咁傾結婚係咁喊，佢唔係求奶奶比金佢，反而係求自己媽媽（我外婆）唔好咁介懷，因為我外婆覺得自己家清清白白，個女黃花閨女，正正經經咁嫁入佢地屋企，點解男家咁衰！雖然最後都係無改變到咩。但事實驗明，外家真係一個女人最大既後盾。
2）姨媽都係一個傳統既人，雖然佢奶奶心地咁差，但佢都算盡責咁做左佢廿年新抱。姨媽本身有學歷所以搵到錢，加上嫁比大仔，所以佢好多時都買好多好野，同埋佢唔會偏心，一件送比外家，一件送比奶奶，賄賂下奶奶，日子都算安穩。可惜佢結婚大約十幾年左右就發現患病，每個月要食好貴既藥，好在積蓄都夠，佢都無諗咁多，點知有一日佢奶奶無啦啦殺上我外婆家，佢同我外婆講：「其實依D病真係一個計時炸彈，仲要唔知食咁貴既藥要食到幾時，不如留番錢比粒孫好過啦」。好在我外婆好忍得，佢好大方好認真咁同佢講「我個女咁搵得（錢），大把積蓄，病有得醫就會好，（好番）到時再搵就得啦，親家你唔洗咁擔心」，我到今時今日都好配服我外婆，不過外婆同我講，令親家母為難咪即係為難自己個女。
姨媽最後都係過左身，雖然大家都好感觸佢咁年輕走左，睇唔到自己兒女既娶妻生子。但某程度上都係一種解脫，女人既原生家庭好，但嫁錯夫家同跌入地獄無咩分別。
事實上都可能有報應，我姨媽死後，佢奶奶有兩個仔加老爺都相繼過左身，奶奶老開始慢性病，其他家人當佢人球咁無人願意照顧佢，將佢推左入老人院。有次我外婆念舊約佢飲早茶，佢同我外婆講，佢咁多仔咁多新抱，得大新抱（我姨媽）真心待佢好。我外婆番黎同我講，就當我姨婆前生欠佢一家，希望今生還清，下生不要再糾纏。
＃我的極品四大長老
Search